Rinis mësimi, por nxënës e prindër kanë ende ankesa. Pedagogët rezerva për mësimin online

Pas pushimeve të zgjatura dimërore, të hënën rinisi mësimi për shkollat 9-vjeçare dhe ato të mesme, kurse për studentët mësimi do të vijojë të jetë online, jo fizikisht në Universitete. Procesi ka vijuar i alternuar mes prezencës fizike dhe në distancë, për të gjitha klasat e tjera përveç atyre të fillores dhe maturës. Disa nxënës, që janë pjesë e mësimit të kombinuar, shprehen se preferojnë të jenë vetëm prezentë në klasë dhe jo online.

”Do doja të bëja mësimin vetëm në shkollë, në klasë se e kemi më të thjeshtë për ta zhvilluar mësimin sesa online. Kur jemi në klasë me mësuesen dhe nxënësit e tjerë, e kuptojmë më mirë mësimin”,-thanë disa nxënës. Nga ana tjetër, edhe pse frika e infektimit nga Covid-19 është e pranishme, prindërit duan mësimin në bankat e shkollës për fëmijët e tyre.

Edhe në Universitete prej disa ditësh ka nisur mësimi online. Pedagogët shprehen se zhvillimi i procesit nëpërmjet një ekrani ka disa mangësi. Sipas tyre, provimet virtuale nuk do të ishin matës realë të dijeve të përftuara nga studentët. Mësimi i alternuar në shkolla dhe ai online në universitete, do të vazhdojnë deri në një afat të pacaktuar, në varësi të ecurisë së pandemisë.