“Rosalinda 4 vjeçe është e sëmurë me temperaturë në një çadër të ftohtë”, Agron Shehaj publikon fotot: Duhet ndërhyrje urgjente e shtetit

Ish-deputeti i PD Agron Shehaj me anë të një statusi në “Facebook” ka postuar disa fotografi të dhimbshme të të prekurve nga tërmeti, të cilët strehohen nëpër çadra.

Shehaj shkruan se ndër personat që rrinë në çadra është edhe Rosalindra 4 vjeçe, kurse shton se duhet një ndërhyrje emergjente e shtetit.

Postimi i Agron Shehajt:

Rosalinda 4 vjeçare është e sëmurë me temperature të lartë, dergjur në një çadër të ftohtë, ngritur mbi truall balte, pa asnjë përkujdesje shëndetësore.

Si Rosalinda nëpër çadra ka me qindra fëmijë, pleq, njerëz me sëmundje kronike.

Vetëm në Bubq rreth 300 familje po jetojnë nëpër çadra të vogla të ngritura në oborret para shtëpive të rrënuara.

Gjendja nëpër çadra, me dimrin e ftohtë dhe të lagësht që ka rënë, është në prag të katastrofës njerëzore.

Tragjedia e tërmetit ja ka lënë vendin dramës mizore së mbijetesës së njerëzve të braktisur totalisht nga shteti. Me një grup qytetarësh po mundohemi të lehtësojmë dhe ndihmojmë sa më shumë. Por duhet ndërhyrja urgjente e shtetit qe e paguajmë për të garantuar jetën dhe sigurinë tonë. Mediat kanë një rol të madh për të vetëdijësuar, por duhet të mos merren me gishtin e kryeministrit!