Rreziku nga terrorizmi, Tahiri: Rritje masave të sigurisë në vend
Ministri i Brendshëm Saimir Tahiri ka deklaruar mbrëmjen e së premtes se Shqipëria nuk është e përjashtuar nga rreziku i sulmeve terroriste.
Për këtë arsye, ka thënë ai, në të gjitha objektet e rëndësisë së veçantë dhe në ambjente të frekuentuara gjerësisht nga qytetarët do të ketë masa të shtuara sigurie.
Në këto të fundit, ka saktësuar Tahiri, përfshihen qendrat tregtare, këndet e lojrave të fëmijëve, sheshet publike, etj.
Këtë deklaratë ministri Tahiri e ka bërë nga qyteti i Durrësit, ku ka zhvilluar një takim me përfaqësues të biznesit, për të shkëmbyer mendime dhe konstatuar probleme.
Problemet në fjalë, ministri i Brendshëm i ka etiketuar si “probleme teknike” që janë trashëguar përgjatë historisë së marrëdhënieve mes shtetit dhe biznesit./Top Channel/