Rritet numri i aksidenteve, policia: Shkak shpejtësia

Muaji gusht është edhe periudha që shënon pikun e sezonit turistik, e si pasojë regjistrohet edhe numri më i madh i makinave në qarkullim. Policia Rrugore ka marrë masa për të garantuar sigurinë veçanërisht në segmentet e rrezikshme që janë burim aksidentesh.

Shefi i trafikut për Tiranën, Taulant Gjoka, thotë se edhe këtë vit problem mbetet shpejtësia e madhe. Përgjithësisht moshat e reja janë më të prirura për të shkelur normat e lejuara të shpejtësisë. E ndërkohë që numri i personave që udhëtojnë drejt jugut të vendit vjen duke u rritur, sipas ekspertit të sigurisë rrugore, Gëzim Hoxha, një tjetër problem janë edhe punimet në rrugë.

Hoxha shton se edhe pse faktorët që ndikojnë në rritjen e aksidenteve rrugore janë të shumta, faktori kryesor mbetet ai njerëzor. Sipas të dhënave të INSTAT, gjatë 6-të mujorit të parë të 2018, kanë humbur jetën 98 persona në aksidentet rrugore të ndodhura në akse të ndryshme të vendit.