Rruga në Hotolisht, drejtori i ARRSH: Kemi marrë vendim për të ndërtuar tunel

ARRSH ka reflektuar shqetësimet e ngritura nga banorët e Hotolishtit në Librazhd në lidhje me gjurmën e Koridorit të VIII në fshatin e tyre.

Pas disa protestave të banorëve të Hotolishtit, ARRSH ka mbledhur ekspertët duke i dhënë zgjidhje me tunel kalimit në këtë zonë.

“Është adresuar, kemi vendim të këshillit teknik dhe do e zgjidhim me tunel. E kemi parashikuar në buxhet për vitin e ardhshëm, por mundet edhe ta afrojmë.

Edhe Ura e Mirakës do të jetë në ndërhyrjet e ARRSH. Në të njëjtin vend kemi ndërtuar edhe kanalin vaditës”, tha Ami Kozeli, Drejtor i ARRSH.

Banorët kundërshtuan gjurmën fillestare të rrugës e cila prekte rreth 30 objekte, duke cënuar, sipas tyre, edhe historinë e kësaj zone. Projekti për zgjerimin e koridorit të VIII në 7 lotet e tij ekzistuese pritet të përfundojë rreth fundit të këtij viti.