Sako: Në Durrës vijon puna për vlerësimin e objekteve

“Bashkia e Durrësit është ende në fazën e vlerësimit të objekteve. Normalisht mendojmë ta fillojmë nga lagjja që është paralel me rrugën e portit, sepse aty janë të gjithë objektet të para viteve ’93 dhe kanë të njëjtën natyrë dëmtimi”, deklaroi në një intervistë për ATSH-në, Emiriana Sako, drejtore e Përgjithshme e Shërbimeve Publike në bashkinë e Durrësit.

Sako tha se me përfundimin e procesit do vijojmë edhe me zona të tjera që mund të jetë ajo e parafabrikateve mbrapa zonës së stadiumit, por jemi në momentin e vlerësimit të tyre. Drejtoresha Sako u shpreh se “në datë 10 dhjetor Këshilli Bashkiak i Durrësit miratoi një projekt vendim ku konfirmon shtimin e një strukture prej 100 personash në drejtorinë e ndërmarrjes rruga”.

“Këta 100 persona do të kenë kualifikimin e punëtorëve të thjeshtë dhe teknikëve të ndërtimit, të cilët do të punojnë me riparimin e muraturave, dhe problematikat e vogla që ka pasur struktura në objektet e evidentuara nga dëmet e tërmetit të datës 26 nëntor duke referuar ndërtimeve të para viteve ’93”,-theksoi Sako.

Nga ana tjetër, ajo tha se ”Aktualisht jemi duke bërë procedurat që kërkon ligji për ti marrë në punë këta persona dhe më tej shpërndarja e punës do të bëhet sipas nevojave që ka evidentuar terreni. Me përfundimin e procesit do vijojmë edhe me zona të tjera ku mund të jetë ajo e parafabrikateve mbrapa zonës së stadiumit, por jemi ende në momentin e vlerësimit të tyre”.