Samiti i Zagrebit, fokusi te Integrimi dhe Covid-19

Në këtë kohë të pandemisë së Covid-19, Samiti i Zagrebit do të bashkojë krerët e shteteve ose qeveritë nga vendet anëtare të BE-së nga njëra anë dhe Shqipëria, Bosnja dhe Hercegovina, Serbia, Mali i Zi, Republika e Maqedonisë së Veriut dhe Kosova nga ana tjetër.

Presidenti i Këshillit Europian, Charles Michel, do të kryesojë takimin. Ai do të përfaqësojë BE-në së bashku me Presidenten e Komisionit Europian, Ursula Von der Leyen. Udhëheqësit do të riafirmojnë perspektivën evropiane të Ballkanit Perëndimor dhe angazhimin për të mbështetur vlerat dhe parimet evropiane.

Vëmendje e veçantë pritet t’i kushtohet edhe situatës aktuale me Covid-19 dhe do të shkëmbejnë mendime mbi fazën e re të bashkëpunimit të ngushtë për të trajtuar ndikimin e rëndësishëm socio-ekonomik të krizës Covid-19, rëndësinë e bashkëpunimit rajonal, si dhe mënyrën e menaxhimit më të mirë të sfidave të sigurisë.