Samiti në Slloveni, EURACTIV: Mbështetet Ballkani Perëndimor, por s’ka një afat kohor

Kryetarët e shteteve dhe të qeverive të BE-së dhe drejtuesit e vendeve të Ballkanit Perëndimor, nesër do të bëhet bashkë në një samit ku do të diskutohet perspektiva e anëtarësimit të vendeve të Ballkanit.

Krerët e vendeve të BE-së do të konsultohen me kryetarët e shteteve dhe të qeverive të vendeve të Ballkanit Perëndimor: Shqipërisë, Maqedonisë së Veriut, Serbisë, Kosovës, Bosnje-Hercegovinës dhe Malit të Zi. Në këtë raund do të bisedohet për mundësinë e zgjerimit të BE-së. Për shkak të rezervave që kanë vende të ndryshme anëtare të BE-së ky proces prej vitesh ka mbetur pezull.

Sipas një shkrimi të botuar sot nga EURACTIV, referuar nga dokumenti, udhëheqësit e BE do të rikonfirmojnë angazhimin e tyre për zgjerim të mëtejshëm, duke ofruar një bashkëpunim shumë më të gjerë për rajonin, por duke mos dhënë një afat kohor siç ishte kërkuar nga Presidenca sllovene, viti 2030.