Sarandë, familja e denoncon për rrëmbim, 22 të shoqëruar

Një 37-vjeçar është denoncuar i zhdukur prej orës 18.30 të së mërkurës. Ndërsa policia ka nisur hetimet për prishje të pazareve të drogës drejt shtetit grek.

Familjarët kanë dhënë dëshmi në Prokurori, ku sipas tyre 4 persona e kanë rrëmbyer pasditen e 17 qershorit në rrugën Turizën- Kanali i Cukës. Sipas tyre ai është keqtrajtuar dhe më pas është futur në makinë. Familjarët identifikojnë një nga autorët me inicialet A.O, i cili sipas tyre është larguar nga Aeroporti i Rinasit. Ata i kërkojnë shtetit t'i ndihmojë për gjetjen e djalit te tyre.

Pas hetimeve, burime zyrtare bëjnë të ditur se bashkëshortja e Ridvan Limaj ka deklaruar në polici se 37-vjeçari është larguar nga banesa.

Policia e Sarandës sqaron se një ndër pistat që dyshon është prishja e pazareve lidhur me trafikun e lëndëve narkotike drejt shtetit grek. Uniformat blu theksojnë se pas hetimeve dhe verifikimeve të deritanishme nuk ka prova që Limaj të jetë rrëmbyer nga persona të tjerë.

Policia e ka shpallur në kërkim tashmë 37-vjeçarin, ndërsa lidhur me rastin janë shoqëruar në ambientet e komisariatit të policisë 22 persona.