Serbia po sillet si Rusia/ Vuçiç: Kosova në NATO është ide e SHBA dhe BE, jo e shqiptarëve

Lufta e Rusisë në Ukrainë, ka nxitur një qëndrim të çuditshëm të Serbisë. Presidenti serb Aleksandër Vuçiç, komentoi aspiratat e Kosovës për t’u anëtarësuar në NATO duke thënë se situata “nuk është aspak naive”. Ai shtoi se këtë ide e ka dëgjuar së pari rreth 6 muaj më parë nga shërbimet e sigurisë të Serbisë.

”Nuk është ide e shqiptarëve nga Kosova, por e lobistëve të tyre dhe e disa politikanëve në SHBA dhe BE. Pse është e rëndësishme për ta? Me këtë lëvizje, ata duan të detyrojnë katër vende të BE-së që janë anëtare të NATO-s, që ta njohin pavarësinë e Kosovës”,- tha Vuçiç.

Reagimi serb erdhi pasi ministri i Mbrojtjes i Kosovës, Armend Mehaj, tha se anëtarësimi i përshpejtuar i Kosovës është një nevojë urgjente, për të garantuar stabilitetin në rajon dhe më gjerë.