Sezoni veror? Klosi: Gati plani për distancimin në plazh

Do të ikim në plazh? Kjo është pyetja më e zakonshme në këtë kohë, ku jeni afër sezonit veror. Sektori i turizmit është ai që ka pësuar dy goditje të njëpasnjëshme në harkun kohor të 6 muajve. Një nga dëmet nga tërmeti dhe një nga izolimi i qytetarëve, si masë kundër përhapjes së pandemisë së Covid-19.

Ministri i Turizmit dhe Mjedisit, Blendi Klosi ka dhënë sinjale shprese se turizmi do të arrijë të shpëtojë. Sipas tij turizmin shqiptar do ta mbajë në jetë turizmi i brendshëm, bujtinat dhe subjekte të hotelerisë të cilët shqiptarët i kanë ngritur me mund.

I sigurtë është fakti se pushimet e këtij viti nuk do të ngjajnë aspak me ato të kaluara, s’ka shkuma parti, koncerte apo mbrëmje të vona në lokalet e natës. Kjo situatë ka edhe anën e artë të medaljes, pasi ajo ka ndikuar në uljen e nivelit të ndotjes si një element shtesë për ministrinë e cila ka planifikuar forcimin e masave mbrojtëse për mjedisin. Në fund ministri Klosi thekson se paketa financiare e ndihmës për turizmin e ka çliruar këtë sektor, ndërsa po diskutohet edhe një plan masash për të mbajtur në këmbë sektorin.