Shahini: Inspektim në 240 shkolla. PD: Mashtrime, s’ka libra falas

Në afro 240 shkolla të vendit, nga data 9 shtator do të zhvillohen “inspektime të rastësishme”. Ministrja e Arsimit, Besa Shahini përmes një mesazhi për mesuesit dhe drejtuesit e shkollave, thotë se e gjithë infrastruktura në shkolla duhet të jetë gati.

”Përshëndetje mësues dhe drejtues shkollash. Jemi në prag të vitit të ri shkollor dhe duam që në 16 shtator ë jemi sa më të përgatitur për të filluar mësimin. Duke filluar nga data 9 shtator ekipet e ministrisë së Arsimit do jenë në terren duke vlerësuar përgatitjet për fillimin e vitit të ri shkollor. Do të jemi në 240 shkolla, të përzgjedhura rastësisht kështu që mund të jemi edhe tek shkolla juaj. Do shohim gjithçka nga klasat, shpërndarja e teksteve falas, regjistrat, gjithçka që të jemi gati që në 16 shtator të fillojmë mësimin”.

Nga ana tjetër, PD-ja ka shtuar akuzat për qeverinë Rama, ku në fokus ka qenë skema e dhënies së librave falas. Nëpërmjet ish-deputetes, Orjola Pampuri, PD-ja deklaron se një lajm i tillë nuk është aspak i vërtetë, sipas së cilëve, fëmijët nuk do i marrin librat falas por prindërit duhet të paguajnë shuma të mëdha. Në vëmendje risillet edhe nisma e ”riciklimit” të teksteve, ku librat shkollorë kalonin brez pas brezit por edhe kjo, sipas Pampurit ishte një hap i dështuar.

”Skemat e mashtrimit të kësaj qeverie nuk kanë të sosur, një nder to është edhe ajo me tekstet shkollore, të cilat prindërve u kushtojnë sa gjysma e pagës në rastin më të mirë kur ata janë të punësuar, e në rastet kur janë me ndihmë ekonomike, pra kanë patur fatin e mirë ta përfitojne atë mes shumë peripecive, librat u kushtojnë sa thuajse tre-fishi i saj. Më konkretisht librat për klasën e shtatë kushtojnë 8061 lekë të reja, le t’i shtojmë kësaj shumë edhe mjetet e shkollës, të cilat kanë një vlerë më vete, fillimi i vitit të ri shkollor shndërrohet në makth për prindërit, të cilët nuk kanë asnjë alternativë tjetër veçse t’i blejnë me çdo kosto”.