SHBA dhe BE: Gjest i shkëlqyer i Shqipërisë

Ambasadori i Bashkimit Europian në Shqipëri, Luigi Soreca, ka përshëndetur veprimin e Shqipërisë, e cila dërgoi ekipin e dytë me 60 infermierë për të ndihmuar shtetin e Italisë. Ambasadori Soreca e konsideron këtë veprim si të shkëlqyer.

“Një tjetër gjest i shkëlqyer solidariteti nga Shqipëria. 60 infermierë shqiptarë fluturuan në Itali për të dhënë kontributin e tyre në luftën kundër Covid-19. Solidariteti është në zemër të vlerave të BE. Faleminderit shumë Shqipëri”.

Vlerësim ka dhënë edhe ambasadorja e SHBA-së në Tiranë, Yuri Kim. Ajo thekson se Shqipëria meriton një falënderim special për aktin e solidaritetit, që ka treguar me fqinjin e saj.

“Si shtet anëtar i NATO-s në betejën e përbashkët nga Covid-19, një falënderim special Shqipërisë për dërgimin e infermierëve në Itali! Ne jemi NATO”. Paçka se Shqipëria vijon të përballet me pandeminë globale të Covid-19, ajo ka zgjedhur të qëndrojë në krah të Italisë për ta ndihmuar sadopak në këtë gjendje aspak të zakontë.