Shehu: Integrimi në BE është një ndihmë reale në përpjekjet për të shpëtuar vendin nga ky regjim

Për ish-ministrin e Jashtëm, Tritan Shehu, deklarata e Departamentit të Shtetit për hapjen e Negociatave të BE-së me Shqipërinë e Maqedoninë e Veriut duhet përshëndetur fuqishëm.

Kjo, thotë ai, për shumë arsye, por më kryesorja është se sipas tij, integrimi i Shqipërisë  në BE është një ndihmë reale në përpjekjet për të shpëtuar vendin nga ky regjim autokatrik që po instalon Edi Rama.

Në reagimin e tij përmes rrjeteve sociale, Shehu deklaron Rama e di që autokratët, kleptokracitë, nuk kanë vend në BE, për rrjedhojë edhe jeta e tij politike shkurtohet në hapësirën Perëndimore.

Prandaj, thotë Shehu, Rama ka devijuar lidhjet kryesore të qeverisë së tij drejt Lindjes.

“Duhet përshëndetur fuqishëm deklarata e Departamentit të Shtetit për hapjen e Negociatave të BE-së me Shqipërinë e Maqedoninë e Veriut!

Pavarësisht deformimeve të thella të demokracisë në Shqipëri, korrupsionit, institucioneve tona tashmë të kapura nga krimi, etj., hapja e negociatave të anëtarësimit në BE është një domosdoshmëri për vendin tonë, shqiptarët dhe Rajonin. Është një ndihmë reale në përpjekjet për të shpëtuar vendin nga ky regjim.

Pa dyshim, mbështetja e proceseve tona të integrimit nga ShBA është shumë e rëndësishme për realizimin e kësaj aspirate jetike të popullit tonë.

Fatkeqësisht, prej vitit 2014 proceset integruese të Shqipërisë jo vetëm janë bllokuar, por kanë bërë edhe hapa mbrapa, duke u shtuar kushtet për t’u plotësuar nga vendi ynë.

Kjo vjen se vizioni, orientimi, vullneti politik i Ramës nuk është Perëndimi dhe integrimi europian. Ai e di që autokratët, kleptokracitë, nuk kanë vend në BE, jeta e tij politike shkurtohet në hapësirën Perëndimore.

Prandaj ai ka devijuar lidhjet kryesore të qeverisë së tij drejt Lindjes; prandaj ai për çdo gjë drejtohet aty dhe jo tek partnerët tanë Perëndimorë; prandaj ai po kërkon të krijojë çdo ditë veçse instrumente e “mekanizma”, që nuk i shërbejnë integrimit tonë, por degdisjes lindore; prandaj ai u bë “tellall” edhe i projekteve vuçiçiane të destabilizimit të Rajonit. Lindja e sistemet autokratike janë “streha” e tij.

Çdo mbështetje, nxitje, zhvillim, që na afron me Europën, ShBA-në e Perëndimin, është një mundësi më shumë, një “armë” e një shpresë për të shpëtuar nga ky regjim antidemokratik, alergjik ndaj familjes sonë natyrale”, deklaroi në reagimin e tij deputeti i zgjedhur i PD-së, Tritan Shehu.

DEKLARATA E DASH-it