Shembjet në bregdet, Lleshaj: Në dorën e pushtetit vendor

Veprimtaria e Inspektoratit Kombëtar të Mjedisit dhe Territorit, paraqet problem edhe për deputetët socialistë të qarkut të Vlorës. Në takimin e zhvilluar në Sarandë për mbarëvajtjen e sezonit turistik, deputeti Damian Gjiknuri dhe Alket Hyseni kërkuan nga Ministri i Brendshëm, Sandër Lleshaj që të ketë më shumë koordinim me strukturat lokale kur bëhet fjalë për prishjen e objekteve. Lleshaj foli edhe për rritjen e numrit të Policisë së Shtetit dhe se ka marrë miratimin e kryeministrit për ta shtuar numrin me 500 punonjës ndërsa theksoi sërish se problemi i kanabisit mbetet një problem serioz që duhet luftuar. Një tjetër problem që ngritën deputetet është edhe fenomeni i vjedhjeve të shtëpive në zonat minoritare për të cilin, Lleshaj tha se po punohet për ta parandaluar.