Shijaku një skenë krimi, banorët ankesa për banesat

Tërmeti tragjik i 26 nëntorit, shkaktoi dëme edhe në Shijak. Dy javë pas tragjedisë, ky vend është kthyer në një skemë krimi. Pallate të dëmtuar dhe të rrethuar me shirita, disa të shënuar me kryqin e kuq dhe banorë që përpiqen të shpëtojnë ç’të mundin nga banesat e tyre është panorama që të shfaqet rrugëve të Shijakut.

Edhe në këtë qytezë, dëmet janë të shumta, jo vetëm për shkak të afërsisë me epiqendrën e tërmetit të 26 nëntorit, por edhe për faktin që disa prej pasgoditjeve të tërmetit e kanë pasur epiqendrën e tyre në Shijak.

Edhe pse kanë kaluar më shumë se dy javë nga tërmeti shkatërrimtar, një pjesë e banorëve janë ende të paqartë se çfarë do të bëhet me banesat e tyre, ndërsa kanë probleme edhe me strehimin. Ata apelojnë që strukturat të vendosin një orë e më parë mbi gjendjen e godinave dhe të japin zgjidhje për mënyrën se si dhe ku do të strehohen.