Shkaktare Rusia? Rrëzimi i avionit të Azerbajxhanit, dy kutitë e zeza do të hedhin dritë mbi të vërtetën

Akuza janë hedhur ndaj Rusisë, pas rrëzimit të avionit të Azerbajxhanit në Kazakistan.

Sipas pretendimeve të autoriteteve vendase një sistem rus kundërajror mund të ketë rrëzuar avionin e pasagjerëve që u rrëzua në Kazakistan në ditën e Krishtlindjeve.

Tashmë është gjetur kutia e dytë e zezë e avionit, që ata shpresojnë se do të hedhë dritë mbi shkakun e katastrofës që vrau dhjetëra njerëz. Do të duhen rreth dy javë për të lexuar kutitë e zeza të gjetura në vendngjarje.

Shenjat tregojnë për një sistem rus që goditi fluturimin J2-8243 të Azerbajxhanit Airlines përpara se të rrëzohej pranë qytetit Aktau, deklaroi zyrtari amerikan për CNN.

Kjo është hera e parë që SHBA ka ofruar një vlerësim të rrëzimit të së mërkurës, i cili vrau të paktën 38 nga 67 personat në bordin e avionit.

Zyrtarët nga Azerbajxhani, Kazakistani dhe Rusia u kërkuan njerëzve që të mos spekulojnë për rrëzimin e avionit derisa hetimet të kenë përfunduar.

Një komision është ngritur për të hetuar, duke përfshirë përfaqësues nga Kazakistani, Azerbajxhani dhe Rusia.

Megjithatë, agjencitë e zbatimit të ligjit të Rusisë dhe Azerbajxhanit nuk do të lejohen të kryejnë një hetim mjeko-ligjor.

Avioni po udhëtonte nga kryeqyteti i Azerbajxhanit Baku për në Grozny, kryeqyteti i republikës jugore ruse të Çeçenisë, përpara se të bënte një ulje emergjente rreth 3 kilometra nga Aktau,.

Mediat shtetërore ruse raportuan se avioni u ridrejtua për shkak të mjegullës së madhe në Grozny.

Sipas faqes së internetit të gjurmimit të fluturimeve, avioni u nis të mërkurën në orën 7:55 të mëngjesit me orën standarde të Azerbajxhanit dhe u rrëzua rreth dy orë e gjysmë më vonë.