Shkodra, qarku i tretë me numrin më të lartë të ankesave ndaj policisë

Pas Tiranës dhe Durrësit, është Shkodra qarku i tretë në rang republike për numrin më të lartë të ankesave që qytetarët kanë në drejtim të policisë së shtetit.

Ishte shefi i sektorit të inspektimit tek SHÇBA, Sterjo Golloshi, gjatë një fushate promovuese në shkollat dhe institucionet publike të kryeqendrës së veriut, bëri me dije një fakt të tillë.

Sterjo Golloshi: Ankesat janë jo vetëm për strukturat që ju përmendët, policinë, gardën e republikës dhe shërbimin zjarrfikës, por shërbimi mirëpret çfarëdo lloj ankese që qytetarët kanë ndaj strukturave të policisë së shtetit.

Dy janë sektorët që mbajnë rekordin e ankesave, policia rrugore dhe ajo e rendit.

Sterjo Golloshi: Mbizotërojnë kryesisht ankesat sa i përket policisë rrugore në lidhje me masat administrative por gjithashtu edhe për procedurën e ndjekur nga strukturat e policisë së shtetit për trajtimin e konflikteve të ndryshme.

Por në Shkodër ku u prezantuan rezultatet e këtij vrojtimi ankesat e qytetarëve nuk kanë larguar asnjë efektiv policie, qoftë penalisht, qoftë administrativisht.

Shkodra ishte përzgjedhur për të përmbyllur një fushatë që SHÇBA ndërmori në shkolla dhe institucione publike.