Shqipëri- Kinë dhe Tajvani që pret me 2 miliardë dollarë

Edi Rama ndodhet në Kinë. Ai ka nisur sot në profilin e tij në Facebook këtë tekst:"Gjatë punimeve dje në Samitit Ekonomik Kinë-Europa Qendrore dhe Lindore në Suzhou të Kinës, me fokus forcimin e bashkëpunimit me përfitim reciprok mes 16 vendeve të EQL dhe Kinës, në përpjekjet e përbashkëta për rritjen e qëndrueshme ekonomike.

Në vitin e tyre të 66, marrëdhëniet midis Kinës dhe Shqipërisë, janë në një moment mjaft pozitiv dhe po forcohen në drejtime të reja; Nisma 16+1 si edhe ajo Belt and Road, janë dy platforma të tjera që i shërbejnë forcimit të mëtejshëm të këtyre marëdhënieve, sidomos në aspektin ekonomik. Gjithashtu, binjakëzimi i qytetit Shantou, ku nis Rruga e Mëndafshit në Kinë, me qytetin e Durrësit, jo vetëm do të shtrojë më tej rrugën për zhvillimin e portit të Durrësit, por do të çelë një fazë të re në rritjen e investimeve ku moment me rëndësi të veçantë përbën ndërtimi i Zonës Ekonomike me Parkun Industrial të Spitallës.

Nga ky takim i katërt pritet të nisin projekte të reja konkrete në sektorë me rëndësi të veçantë në zhvillimin e gjithë rajonit si energjia, turizmi, bujqësia dhe infrastruktura. Po ashtu, Shqipëria së bashku me Malin e Zi, si edhe me Bosnie-Hercegovinën dhe Kroacinë, janë koordinuar për financimin e Autostradës Adriatike-Ioniane, e quajtur ndryshe “Korridori i Kaltër”.

Ndërkohë që Edi Rama ndodhet në Kinë mësohet se ka patur një takim sekret me një përfaqësi biznesmenësh nga Tajvani, ishulli përballë Kinës që herë ka pozita miqësie me Kinën e  shumëherë praglufte. Tajvani është aleat strategjik i SHBA. Nuk dihet se çfarë është biseduar nga kryeministri Rama me palën tajvaneze, porse dihet se nga Tajvani ofrohet një paketë mbi 2 miliardë dollarë investime.