Shqipëria dhe Kroacia bashkëpunim ndaj krizës së refugjatëve

Aktualitet E Martë, 20 Prill 2021 20:14

Ministrat e mbrojtjes nga Kroacia dhe Shqipëria, në një konferencë të përbashkët shprehën qëndrimet se të dy vendet do të punojnë së bashku për të parandaluar hapjen e mundshme të një korridori të ri të emigrantëve përmes territoreve të tyre, pasi vendet e Ballkanit i kanë mbyllur kufijtë e tyre. Znj.Kodheli ndodhet në një vizitë zyrtare në Kroaci,

Ministri i Mbrojtjes i Kroacisë Josip Buleviq dhe Ministrja Mimi Kodheli ranë dakord për të shkëmbyer informacione dhe do të veprojnë bashkërisht.

Ministrat kanë deklaruar se: “Ne do të punojnë më shumë për të parandaluar valën e emigrantëve”. Ministrja Kodheli theksoi rëndësinë e forcimit të bashkëpunimit në kuadër të iniciativave rajonale si Southeast Europe Defense Ministerial (SEDM) dhe Kartën e Adriatikut e njohur si A-5, dhe shprehu besimin që vendi ynë ka te Kroacia, si kryesuese e A-5 për vitin 2016. Ministrja Kodheli theksoi gjithashtu rëndësinë e anëtarësimit me të drejta të plota në Kartën e Adriatikut, të të gjithë vendeve të rajonit, ndërkohë që bashkërisht shprehën gatishmërinë për të punuar së bashku në operacionet dhe misionet e NATO.

Gjithashtu, dy ministrat ranë dakord edhe për hapjen e zyrave të përfaqësuesve ushtarakë në Tiranë e Zagreb. Ministrja Kodheli përsëriti vendosmërinë e Shqipërisë si një aleate e fortë e “politikës së dyerve të hapura” të NATO, deri në integrimin sa më të shpejtë të Ballkanit Perëndimor në Aleancë.