Shqipëria drejt mposhtjes së koronavirusit, shërohen edhe 15 pacientë të tjerë, vetëm 176 raste aktivë
Shqipëria duket se po fiton betejën me koronavirusin. Gjatë 24 orëve të fundit ka rezultuar pozitiv vetëm një person, ndërsa 15 pacientë kanë fituar betejën me virusin e rëndë.
MSH bën me dije se rreth 78% e të infektuarve janë shëruar, ndërsa vetëm 176 persona janë aktualisht aktivë me koronavirus.
“Të shëruar janë 15 qytetarë. Në spitalin Infektiv, gjendja paraqitet e qëndrueshme prej ditësh me 15 pacientë të shtruar dhe vetëm 3 prej tyre në terapi intensive. Prej më shumë se dy javësh fatmirësisht nuk kemi asnjë humbje jete. Deri më sot janë kryer rreth 13 mijë testime dhe janë konfirmuar pozitivë me COVID-19 në të gjithë vendin 949 qytetarë. Prej tyre, rreth 78% janë të shëruar.
Në vendin tonë aktualisht janë 176 persona aktivë me COVID19, kryesisht ne Tiranë, Durrës, Krujë, Shkodër. Edhe pse situata paraqitet e kontrolluar, vetë qytetarët duhet të tregohen të kujdesshëm, duke respektuar distancimin fizik, duke ruajtur higjienën personale, duke shmangur vizitat tek të afërmit.
Qytetarët të mos neglizhojnë shenjat e sëmundjes Covid-19, por të telefonojnë në numrin unik të Urgjencës Kombëtare 127, ndërsa për çdo pyetje apo shqetësim Ministria e Shëndetësisë ka vënë në dispozicion linjën e gjelbër 0800-40-40”, thuhet në njoftimin e MSH.
