Shqipëria, pjesë e traktatit botëror për pandeminë nga Covid-19

Më shumë se 20 liderë botërore dhe OBSH, kanë përgatitur një traktat ndërkombëtar, kjo për të ndihmuar në përballimin e emergjencave shëndetësore, siç është edhe pandemia e Covid-19 e cila ka gjunjëzuar gjithë globin.

Pjesë e tij është edhe Shqipëria. Ideja e një traktati të tillë, i cili do të siguronte qasje universale dhe të barabartë në vaksinat, ilaçet dhe diagnostikimet për pandemitë, u paraqit nga kreu i Këshillit Evropian, Charles Michel në një samit të G20 nëntorin e kaluar.

Qëllimi kryesor i një traktati të tillë është forcimi i rezistencës mbarëbotërore ndaj pandemive të ardhshme përmes sistemeve më të mira të alarmit, ndarjes së të dhënave, hulumtimeve, prodhimit dhe shpërndarjes së vaksinave, ilaçeve duke e vënë theksin tek bashkëpunimi dhe fryma e solidaritetit. Krahas Gjermanisë, Francës, Britanisë, OBSH pjesë e tij janë edhe Shqipëria, Greqia, Serbia, Rumania, Holanda, Spanja, Norvegjia, Senegali etj.

“Do të ketë pandemi të tjera dhe urgjenca të tjera të mëdha shëndetësore. Asnjë qeveri e vetme ose agjenci shumëpalëshe nuk mund ta trajtojë këtë kërcënim vetëm, Çështja nuk është nëse, por kur”,-shkruajnë udhëheqësit. Një marrëveshje e tillë krahasohet me traktatin e arritur pas Luftës së Dytë Botërore dhe është e nevojshme për të ndërtuar bashkëpunimin ndërkufitar.