Shqipëria po fiton luftën me Covid-19, më shumë të shëruar sesa raste të reja

Shqipëria duket se po shërohet nga pandemia e Covid-19, pasi edhe në 24 orët e fundit ka më shumë të shëruar sesa raste të reja. Aktualisht sipas të dhënave të Ministrisë së Shëndetësisë, testimet totale janë 60418 ku raste të shëruara janë 4923 dhe rastet aktive 4001.

Ministria e Shëndetësisë ka raportuar për 112 raste të reja me Covid-19 për 24 orët e fundit. Dr. Genta Qirjako nga Instituti i Shëndetit Publik, gjatë konferencës për shtyp për përditësimin e të dhënave për virusin vdekjeprurës në Shqipëri, tha se 132 është numri i personave të shëruar. ”Pavarësisht përpjekjeve të mjekëve, fatkeqësisht, në dy spitalet Covid, nuk e kanë fituar dot betejën me sëmundjen një 49-vjeçar nga Peqini, një 52-vjeçar nga Durrësi, një 72-vjeçare nga Fieri, një 81-vjeçare dhe një 82-vjeçar nga Tirana me sëmundje bashkëshoqëruese, i shprehim ngushëllimet familjarëve”.

Gjatë 24 orëve të fundit në vendin tonë janë kryer 801 testime për vlerësimin e infektimit nga virusi SARS COV2, dhe 112 persona janë konfirmuar pozitivë me Covid-19. Shpërndarja gjeografike e rasteve pozitive ditore është si vijon: 71 raste në Tiranë, 9 raste në Durrës, 5 raste në Elbasan, nga 4 raste në Krujë, Kurbin, Lezhë, Kavajë, 3 raste në Fier, 2 raste në Berat, nga 1 rast në Shkodër, Devoll, Has, Lushnje, Gjirokastër, Vorë.

Nga ana tjetër, Qirjako tha se në spitalin Infektiv dhe “Shefqet Ndroqi” po trajtohen 173 pacientë të konfirmuar pozitivë me Covid-19, 18 në terapi intensive nga të cilët vetëm 8 pacientë janë të intubuar. ”Ju informojmë se në dy spitalet Covid janë gjithashtu duke marrë shërbim të specializuar 42 qytetarë të cilët kanë qenë pozitivë me Covid-19 dhe aktualisht janë negativizuar, por po vijojnë të marrin trajtim spitalor për pasojat e sëmundjes”.

Në fund të deklaratës, ajo dha edhe mesazhin që ka Ministria e Shëndetësisë për qytetarët, ku nënvizohet se ndalohen të gjitha grumbullimet pasi janë burim i përhapjes së infeksionit, duke vënë në rrezik shëndetin.

”I drejtohemi të gjithë qytetarëve, për kujdes të shtuar për respektimin e rregullave të vendosjes me detyrim të maskes në çdo ambient të mbyllur, të ruajtjes se distancimit fizik prej të pakten 1.5 metër nga të tjeret si dhe kujdesin për higjienën vetjake dhe kolektive. Rikujtojmë qytetarët se ndalohen të gjitha grumbullimet pasi janë burim i përhapjes së infeksionit, duke vënë në rrezik shëndetin tuaj dhe të afërmve tuaj. Nëse dyshoni se jeni i prekur ose keni shenja të sëmundjes duhet të qëndroni të izoluar, të kontaktoni menjëherë mjekun e familjes ose të telefononi në numrin e Urgjencës Kombëtare 127. Ministria e Shëndetësisë ka vënë në dispozicion të qytetarëve linjën e gjelbër 0800 40 40 për të kontaktuar për çdo informacion tjetër rreth Covid-19”.

Covid-19 – Statistika (28 Gusht 2020)

Testime totale 60418
Raste pozitive 9195
Raste të shëruara 4923
Raste Aktive 4001
Humbje jete 271 (Qarku Tiranë 128, Durrës 38, Shkodër 35, Elbasan 14, Fier 13, Korçë 12, Lezhë 10, Kukës 6, Vlorë 6, Dibër 4, Gjirokastër 3, Berat 2)

Shpërndarja gjeografike e rasteve aktive sipas qarqeve:

Tiranë 2063
Durrës 527
Shkodër 282
Fier 149
Lezhë 187
Korçë 184
Vlorë 137
Kukës 136
Elbasan 161
Berat 80
Gjirokastër 41
Dibër 54