Shqiptarët e Kosovës preferojnë bregdetin shqiptar

Ashtu si cdo vit, pas përfundimit të muajit të Ramazanit, pushues të shumtë i drejtohen bregdetit shqiptar. Menjehere pas festës së Fiter Bajramit vihet re rritja e numrit të pushuesve kosovar që i drejtohen plazheve në Shqipëri.

Pas mbylljes së muajit të Ramazanit dhe festës së Fitër Bajramit, ka nisur fluksi i shqiptarëve të Kosovës të cilët i drejtohen bregdetit të Shqipërisë.

Në Rrugën e Kombit, lehtësisht vihet re numri i lartë i automjeteve që vinë nga Kosova. Pushuesit theksojnë se preferojnë ti kalojnë pushimet në Shqipëri falë bukurive natyrore dhe faktit që e ndjejnë veten të sigurt si në vendin e tyre.

Destinacionet kryesore të pushuesve kosovarë mbeten Durrësi, Vlora, Shëngjini e Velipoja, por së fundmi edhe Saranda.

Më shumë se një milion pushues nga Kosova kanë preferuar të frekuentojnë bregdetin shqiptar gjatë sezonit veror të vitit të kaluar.