Shtyrja e vitit shkollor, PD: Dështim i qeverisë me mësimin online

Pas njoftimit të ministres së Arsimit Evis Kushi për shtyrjen e nisjes së vitit shkollor ka ardhur edhe reagimi i selisë blu. Në një deklaratë në rrjetet sociale, deputetja e zgjedhur demokrate Oriola Pampuri shprehet se shtyrja e vitit shkollor dëshmon se Ministria e Arsimit ka dështuar me mësimin online dhe mësuesit ndihmës për familjet me fëmijët me aftësi te kufizuar. Sipas saj kjo do të krijojë boshllëqe për nxënësit.

“Shtyrja e vitit shkollor dëshmon se Ministria e Ç’arsimit ka dështuar me mësimin online dhe mësuesit ndihmës për familjet me fëmijët me aftësi të kufizuar.

Boshllëqet nga dështimi i mësimit online dhe mangësitë në mësues ndihmës nuk mund të zgjidhen duke shtyrë datën e nisjes së procesit mësimor, e cila ne vetvete nuk bën gjë tjetër veçse krijon hendeqe të tjera për nxënësit, sa i përket njohurive për vitin e ardhshëm mësimor. I gjithë ky ç’organizim vjen pikërisht nga paaftësia për të menaxhuar situatën përballë pandemisë, si me mësimin online, ashtu edhe me mësuesit ndihmës.

Detyra e qeverisë ishte të bënte mësim plotësues gjatë verës, kur infektimet ishin të pakta. Ndërsa shtyrja e tanishme e mësimit do të ketë efekte zinxhir për mësimdhënien, për familjet, në kushtet e rritjes së kurbës së infektimeve në vjeshtë. Asnjë mësim nuk nxorën nga viti i shkuar, përkundrazi, vijojnë të veprojnë pa plan, duke lënë në mëshirë të fatit nxënësit dhe mësuesit”, shkruan Pampuri.