Shumë familje të prekura nga tërmeti përballojnë acarin në çadra vere

Mbi 10 mijë persona e përballuan në çadra stuhinë e pazakontë dhe uljen e temperaturave që përfshiu vendin mbrëmjen e së dielës. Fëmijët ishin ata që e vuajnë më së shumti të ftohtin, ndaj prindërit nuk kursejnë në kritika autoritetet.  Ndërkohë shumë familje në bashkitë e prekura nga tërmeti thonë se po hasin vështirësi për të gjetur shtëpi të reja me qira.

Temperaturat që zbritën disa gradë nën zero e bënë më të vështirë jetën për familjet që tërmeti i 26 nëntorit i la në çadra në vend të shtëpive.

Fëmijët ishin ata që e vuajtën më shumë.

Shpëtim ishin vetëm batanijet!

Në Mazhë dhjetëra familje i bënë ballë stuhisë së pazakontë me çadra verore mes të ftohtit dhe mungesës së energjisë elektrike.

Ankohen se vendorët i kanë harruar.

Por megjithatë kushtet e vështira, banorët e zonave rurale në Krujë e Kurbin nuk pranojnë të largohen nga shtëpitë, pasi thonë se aty mbrojnë pasurinë e një jete.

Por edhe ata që kanë përfituar bonusin e qirasë në Laç e kanë të vështirë të gjejnë një shtëpi.

Pas paralajmërimit se të strehuarit në hotele do të nxirren së shpejti, qiratë janë rritur deri në trefish.

3 983 banesa janë evidentuar të dëmtuara nga tërmeti në qarkun e Lezhës.

Rreth 1 mijë familje kanë aplikuar për bonusin e qirasë, por tashmë po hasin në vështirësi për të gjetur shtëpinë e re.

/Ora News