“Siguria juaj, prioriteti ynë”, Policia takim me gjimnazistë
Drejtori i Përgjithshëm i Policisë së Shtetit, Ardi Veliu, së bashku me drejtorin dhe zv/drejtorin e Drejtorisë Vendore të Policisë Tiranë dhe shefin e Komisariatit të Policisë nr.1, me ftesë të drejtoreshës së gjimnazit morën pjesë në takimin e organizuar për sigurinë e nxënësve, jo vetëm në shkollë por edhe jashtë saj. Drejtoresha e gjimnazit “Ismail Qemali”, Rezarta Alla, ka theksuar se prania e kaq shumë aktorëve, të cilët janë përgjegjës për sigurinë, na bën më optimistë dhe e bën më të lehtë punën tonë për të realizuar një proces të mësimdhënies sa më të qetë dhe të suksesshëm.
Gjatë takimit, Veliu u është përgjigjur pyetjeve të shumta të adresuara nga nxënësit. Veliu ka bërë prezent para tyre, stafit pedagogjik dhe bordit të prindërve prioritetet e Policisë së Shtetit për garantimin e rendit dhe sigurisë, parandalimin e fenomeneve negative për bashkëpunimin Polici-shkollë, bord i prindërve dhe oficer i sigurisë në shkolla, për trajtimin e konflikteve mes adoleshentëve dhe rolin e psikologut në Policinë e shtetit. Gjithashtu, ka premtuar se Akademia e Sigurisë po përgatit oficerë të policisë kriminale, të cilët në bashkëpunim me bashkinë Tiranë dhe Drejtorinë Arsimore do të zhvillojnë takime në të gjitha shkollat 9-vjeçare dhe të mesme, për t’i njohur nxënësit me legjislacionin dhe penalitetet që sjell shkelja e ligjit.
Drejtori i DVP Tiranë, Rebani Jaupi në fjalën e tij ka vlerësuar bashkëpunimin mes Policisë së Tiranës dhe drejtorive të shkollave për parandalimin e konflikteve mes adoleshentëve, si dhe ka ftuar nxënësit të denoncojnë në numrin 112 e në Komisariatin Dixhital çdo problematikë, sado e vogël qoftë ajo, se vetëm duke i trajtuar në kohë parandalojmë përshkallëzimin e tyre. Jaupi i ka cilësuar të rinjtë si një dritare e hapur për të bashkëpunuar me Policinë dhe u premtoi atyre se Policia e Tiranës do jetë në çdo kohë e pranishme për t’u ardhur në ndihmë në rast nevoje, por edhe për të zhvilluar mes Policisë dhe shkollës aktivitete të përbashkëta në interes të rritjes së parametrave të sigurisë.
