Silva Bino: Bëni dozën e dytë të vaksinës, studimet tregojnë efektivitet ndaj variantit Delta

“Mos neglizhoni dozën  e dytë”. Ky është mesazhi i shefes së Departamentit të Epidemiologjisë, Silva Bino, që citon një studim që vlerëson efektshmërinë e dozës së dytë edhe për variantin Delta të koronavirusit, që duket më i rrezikshmi për momentin.

“Studimi më i fundit i Agjencisë të Shëndetit publik në Angli, akoma jo i certifikuar tregon për herë të parë se 2 doza të vaksinave ndaj COVID-19 janë mjaft efektive ndaj hospitalizimeve nga varianti Delta (B.1617.2). Pritet që ky efekt te jete i lartë edhe ndaj vdekshmërisë. Analiza tregon se ky efektivitet i vaksinave është i krahasueshëm me atë ndaj variantit Alpha”, shkruan mjekja e njohur në profilin e saj.

“Në një botë që po hapet dhe me udhëtimet nga një vend në tjetrin askush nuk është i mbrojtur ndaj sëmundjeve të rënda që mund të shkaktojnë variantet e reja nëse nuk është i vaksinuar dhe për më tepër në çdo lloj moshe”, vijon mesazhin Bino.