Silva Bino: Në zonat e gjelbra asnjë i infektuar. Transmetim të virusit kemi në Tiranë dhe Krujë

Shefja e Departamentit të Epidemiologjisë dhe Kontrollit të Sëmundjeve Infektive në Institutin e Shëndetit Publik, Silva Bino, në mbledhjen e Komitetit Teknik të Ekspertëve, tha se situata nga koronavirusi është nën kontroll.

Bino u shpreh se është trefishuar numri i testimeve të kryera dhe se po merren masa për gjetjen aktive të rasteve. Ajo shtoi se në zonat e gjelbra nuk ka pasur asnjë të infektuar me koronavirus dhe se transmetim të virusit kemi në Tiranë dhe Krujë.

“Situata duket jo keq, kemi trefishuar numrin e testimeve këtë muaj dhe kemi dhe një indikator, që është 5% pozitivite, një indikator shumë i mirë në lidhje me kontrollin e virusit. Kjo është arsyeja që po marrim masa që të rrisim numrin e e testimeve dhe të bëjmë edhe gjetje aktive të rasteve. Ne po përdorim disa metodika të reja, duke përfshirë mjekun e familjes dhe duke integruar shërbimet e shëndetit publik. Kemi përforcuar edhe shërbimin e gjurmimit të kontakteve. Kemi dy qytete ku kemi transmetim të virusit, Tirana dhe Kruja dhe vetëm Shkodrën kemi evidentuar raste. Zonat e gjelbra janë pa raste, pavarësisht rritjes së numrit të testimeve”, tha Bino.