Skandali i ilaçeve, Milva Ikonomi në vend drejtorit të dorëhequr

Në krye të Fondit të Sigurimeve të Kujdesit Shëndetësor, pas skandalit dhe dorëheqjes së drejtorit Astrit Beci, është komanduar përkohësisht Milva Ikonomi, e cila deri më tani ka mbajtur postin e zv. ministres së Shëndetësisë.

Këtë e ka konfirmuar ministri i Shëndetësisë, Ilir Beqaj, gjatë inaugurimit të rezonancës magnetike në Spitalin e Traumës, i cili ndonëse përballon fluksin më të madh të pacientëve, si ata të lënduar në aksidente rrugore, plagosjet me armë apo shpërthime, nuk ka pasur një aparaturë të tillë, duke bërë që pacientët e dëmtuar t’i drejtoheshin për një ekzaminim të tillë shërbimit të neurologjisë në QSUT, për t’u kthyer sërish.

Ministri Beqaj theksoi se mjekëve të zotë që ka Spitali i Traumës, apo ish-Spitali Ushtarak që njihet, po i vihet në dispozicion infrastruktura e munguar deri më tani.

Përveç rasteve urgjente, rezonanca magnetike e instaluar pranë Spitalit të Traumës do të reduktojë dhe radhët e pacientëve që presin për të kryer këtë ekzaminim në shërbimin e neurologjisë në QSUT.