Sot Dita e Europës. Programi ”EU4Schools” ka finalizuar 40 objekte arsimore në mbarë Shqipërinë

Në Ditën e Evropës, Programi i Kombeve të Bashkuara për Zhvillim (UNDP) në Shqipëri falëndëron Bashkimin Evropian për partneritetin afatgjatë në avancimin e Agjendës së Zhvillimit të Qëndrueshëm në Shqipëri. Në këtë kuadër, shtyllë bazë e partneritetit UNDP-BE është edhe Programi “EU4Schools” / “BE për Shkollat”, i cili synon rindërtimin apo riparimin e 60+ objekteve arsimore në 11 bashkitë më të prekura nga tërmeti shkatërrimtar i 26 Nëntorit, 2019-të, me përfitues 25,000 fëmijë, nxënës e mësues në total.

“Mësimdhënie dhe mësimnxënie më cilësore dhe më produktive, arsimim bashëkohor pikërisht si në vendet e Bashkimit Evropian, siguri e lartë dhe standarde të larta të objekteve arsimore – këto janë pikërisht çfarë ofron Programi “EU4Schools”, i financuar nga BE me 75 milion Euro dhe zbatuar nga Programi i Kombeve të Bashkuara për Zhvillim (#UNDP) në Shqipëri”, shprehet UNDP Albania.

Deri më sot në kontekstin e Programit “EU4Schools” / “BE për Shkollat” kanë përfunduar 40 objekte arsimore, ndërsa aktualisht puna vijon intensivisht për rindërtimin apo riparimin e 15 objekteve të tjera. Programi bazohet në parime themelore: “Rindërtojmë Më Mirë” dhe “Rindërtojmë Së Bashku”.

“Rindërtojmë Më Mirë” nënkupton ndërtimin e strukturave më të forta që mund t’iu rezistojnë tërmeteve dhe fatkeqësive natyrore, duke pasur standardet më të larta ndërkombëtare të cilësisë dhe sigurisë (EUROCODE 8). Të gjitha objektet arsimore, pjesë e “EU4Schools”, do të kenë burime të energjisë së rinovueshme, do të jenë plotësisht të aksesueshme nga nxënësit dhe fëmijët me aftësi të kufizuara dhe do të kenë hapësira të dedikuara për kujdesin mjekësor dhe mbështetjen psikologjike.

Ndërkohë, parimi “Rindërtojmë Së Bashku” nënkupton ofrimin e mundësive unike për të përfshirë përfituesit në rindërtimin e institucioneve të tyre arsimore dhe për ta “përshtatur” projektin sipas nevojave të tyre. 65 takimet konsultuese dhe 40 vizitat monitoruese të organizuara deri më tani kanë mbledhur së bashku 2,425 nxënës, fëmijë, prindër, anëtarë të komunitetit e përfaqësues të institucioneve vendore e qendrore duke nxitur kështu edhe pronësinë dhe qëndrueshmërinë e investimit.