Spahiu: Rama i kërkoi SPAK-ut të hetohet Kryemadhi, njësoj siç bën me Ahmetajn

Kreshnik Spahiu ka analizuar deklaratën e Ramës në lidhje me akuzat ndaj Kryemadhit për financime nga kompani ruse. Për të Rama përmendi dy standarde, duke iu referuar çështjet se ish-zv/kryeministrit Arben Ahmetaj. Sipas Spahiut, Rama i kërkon Prokurorisë së Posaçme (SPAK), që të hetojë Kryemadhin, ashtu siç po bën aktualisht me Ahmetajn.

“Që të kritikosh Berishën, Metën, Kryemadhin është shumë e thjeshtë politikisht, por që t’i vendosësh akuzë penale, duhet të jesh i bindur dhe të kesh prova të mjaftueshme. Unë nuk mund të them asgjë për disa akuza penale që i bëhen zonjës Kryemadhi, kur personalisht nuk i kam parë ato prova. Ajo çfarë do të komentoja unë për deklaratën e kryeministrit, është që kryeministri, jo rastësisht thotë dy standarde. Pse thotë dy standarde?

Në deklaratën e tij shprehet për hetim ndaj Kryemadhit, por nuk e thotë se kush është standardi tjetër. Unë mendoj që zoti Rama është duke iu referuar çështjes së zotit Ahmetaj. Këtu, ai i referohet që ka dy standarde. Për zotin Ahmetaj, është hapur procedimi penal mbi akuzat që janë publikuar nga disa media në Shqipëri.

Ai pretendon kur për ish-zv/kryeministrin socialist hapët hetim dhe i kontrolluat banesat për 3 lajme që u dhanë në mediat shqiptare, pse për Kryemadhin, kur jepet nga mediat ndërkombëtare, prokuroria nuk ka të njëjtin standard si me Arben Ahmetajn”, tha për ”Euronews Albania”.