SPAK heton deputeten Klotilda Bushka, Rama: Shenja aspak të mira, kjo nuk është republikë prokurorësh

Kryeministri Edi Rama foli edhe për deputeten e PS-së Klotilda Bushka, e cila është kryetare e Komisionit të Ligjeve dhe që është në hetim nga SPAK në dosjen e Erion Veliajt.

”Kryetari i Komisionit të Ligjeve më ka kërkuar, ose ka kërkuar të dëgjohet nga grupi parlamentar. Pse? Sepse e ka dëgjuar nga Tv, jo nga prokurorët, por Tv, gazetarë special që disponojnë dokumente që nuk i kanë as të akuzuarit, se është person i dyshuar.

Këto nuk janë shenja aspak të mira. Unë dua të shpresoj që nuk janë shenja që lidhen me simtomat e një sëmundjeje vetëbesimi.

E dua të besoj tek ajo që kam thënë. I qëndroj se kjo nuk është republikë prokurorësh që është në materializimin e saj përfundimtar sepse do të ishte autogoli më i madh që në vullnet të mirë dhe me sy mbyllur do të bënim duke transformuar drejtësinë”.