SPAK-u në 2024, Baçi: Guxoi dhe preku. Silva Caka: Institucion i statistikave penale
Në këtë vit SPAK ka pasur një rol kryesor, veçanërisht përsa i takon arrestimit të ish-Presidentit Ilir Meta, arrestimin e ish-ministrit të Shëndetësisë, Ilir Beqaj, ndjekjes penale ndaj ish-Kryeministrit Sali Berisha, i cili akuzohet për korrupsion, apo hetimeve për kryebashkiakun e Tiranës, Erion Veliaj.
Analisti Agim Baçi duke komentuar punën e SPAK tha se ajo që ka prekur Prokuroria Speciale nuk ka qenë e lehtë, duke pasur parasysh arrogancën e pushtetit në raport me shkeljet ligjore. “Dy herë kreu i SPAK, Altin Dumani, ka pohuar se kanë rënë denoncimet e administratës publike lidhur me korrupsionin. Pra ka zbuluar se janë fenomene që nuk mund të zbulohen lehtësisht. SPAK ka guxuar dhe prekur”, tha Baçi.
Silva Caka nga PL-ja tha se “SPAK duket se është kthyer në një institucion të statistikave penale, pa kryer hetime, për shumë prej tyre, duke copësuar dhe fragmentarizuar çështje mjaft të rëndësishme”.
“Prova më e madhe e SPAK është ajo e inceneratorëve. Që nga momenti që inceneratorët trajtohen si një gjë e fragmentarizuar, SPAK ka humbur kredibilitetin e vet”, tha Caka. Sipas saj, në Shqipëri vijon të ketë një korrupsion mjaft të lartë. “Nuk shoh se kemi përmirësime as në fushën e krimit të organizuar, kemi krimin e organizuar të shtrirë në terren, ka marrë revansh”, tha Caka në ”News 24”.
