Spiropali: Lufta në Ukrainë, përplasje e 2 botëve sfidë mes demokracisë dhe autokracisë

Ministrja e Shtetit për Marrëdhëniet me Parlamentin, Elisa Spiropali është shprehur se lufta në Ukrainë është një përplasje mes dy botësh si edhe një sfidë mes demokracisë e autokracisë.

“Tre dekada pas shpërbërjes së Bashkimit Sovjetik, një tjetër perde në aksin lindje perëndim, ka ndarë rishtas Europën. Kësaj Herë në Ukrainë, aty ku nacional-imprealizimi i ri rus, ka shpërthyer një luftë të padrejtë dhe mizore.

Perdja e re e hekurt, është aty ku fantazia janë plumbat, predhat, dhe avionët dhe tanket. Aty ku të vrarët janë të vërtetë dhe bombat po gjymtojnë, pleq, burra fëmijë dhe gra.

Viktimat i përkasin një kombi që ka një histori tjetër dhe ka vendosur që të jetojë në një mënyrë tjetër, duke parë nga perëndimi dhe me shpinë nga e shkuara.

Ajo që po ndodh prej dy vitesh, është një përplasje mes dy botësh, qytetërimesh dhe një sfidë mes demokracisë dhe autokracisë”, tha minsitrja në një manifestim të organizuar nga Bashkia e Tiranës në solidaritet me popullin e Ukrainës.