Spiropali pritet nga kryetarja e Parlamentit të Azerbajxhanit, fokus bashkëpunimi ekonomik dhe tregtar

Kryetarja e Kuvendit, Elisa Spiropali e pranishme në Baku, u prit në një takim nga kryetarja e Parlamentit të Azerbajxhanit, Sahiba Gafarova.

Kryeparlamentaret Spiropali dhe Gafarova diskutuan për marrëdhëniet e shkëlqyera mes dy vendeve tona, vlerësuan zgjerimin e bashkëpunimit ekonomik e tregtar, përshëndetën marrëveshjen e saponënshkruar për zhvillimin e infrastrukturës së gazifikimit të qytetit të Korçës dhe nënvizuan mundësinë e rritjes së investimeve nga Azerbajxhani në Shqipëri në fushat e burimeve të energjisë, infrastrukturës etj.

Gjithashtu, Spiropali dhe Gafarova diskutuan edhe për intensifikimin e marrëdhënieve shumë të mira mes Kuvendit të Shqipërisë dhe Milli Majlis të Azerbajxhanit, si nxitëse të bashkëpunimit të gjithanshëm dypalësh.

Po sot Kryetarja e Kuvendit, Elisa Spiropali mori pjesë si paneliste në takimin parlamentar për Ndryshimet Klimatike, i cili zhvillohet në kryeqytetin e Azerbajxhanit, Baku, ku mbajti fjalën e saj në panelin “Roli i parlamenteve në realizimin e angazhimeve për klimën”.