Spiropali takohet me homologen letoneze: Intensifikojmë bashkëpunimin parlamentar!

Kryetarja e Kuvendit, Elisa Spiropali, ndodhet në Riga për të marrë pjesë në Samitin e Tretë Parlamentar të Platformës Ndërkombëtare për Krimenë, organizuar nga Parlamenti i Letonisë dhe Parlamenti i Ukrainës, në kryeqytetin e Letonisë, Riga.

Pasditen e sotme Kryetarja Spiropali zhvilloi një takim me Kryetaren e Parlamentit të Letonisë Daiga Mierina.

Znj. Spiropali dhe znj. Mierina diskutuan mbi marrëdhëniet shumë të mira midis Shqipërisë dhe Letonisë dhe mundësitë e zgjerimit të tyre në fushën e ekonomisë, tregtisë, transportit, mbrojtjes, zhvillimit teknologjik e digjitalizimit, turizmit dhe në fusha të tjera.

Shqipëria dhe Letonia janë partnerë në NATO dhe në kontributet për mbrojtjen e sigurisë, paqes dhe lirisë së kombeve. Shqipëria dhe Letonia, do të vijojnë mbështetjen e palëkundur për Ukrainën, për sigurinë, kthimin e rendit ndërkombëtar, për një paqe të drejtë të qëndrueshme.

Duke e falenderuar Kryetaren Mierina për mbështetjen për integrimin europian të Shqipërisë, (Letonia është i pari vend anëtar i BE-së që ratifikoi Marrëveshjen e Stabilizim-Acociimit me vendin tonë) Kryetarja Spiropali shprehu besimin se kjo mbështetje do të vijojë edhe pas mbajtjes së Konferencës së Dytë Ndërqeveritare BE-Shqipëri në 15 tetor dhe çeljes së negociatave për grup-kapitujt “Themelorët”. Shqipëria, nënvizoi znj. Spiropali do të vijojë reformat demokratizuese dhe integruese, duke u përgatitur për mbajtjen sa më shpejt të Konferencës së Tretë Ndërqeveritare dhe mirëpresim ekspertizën e Letonisë për përshpejtimin e procesit të anëtarësimit.

Shqipëria është një protagoniste e bashkëpunimit dhe integrimit rajonal dhe Kryetarja Spiropali vlerësoi politikat dhe qasjen konstruktive të Letonisë për Ballkanin Perëndimor, për nxitjen e bashkëpunimit mes shteteve, institucioneve dhe njerëzve në rajon.

Letonia është mes vendeve të para që kanë njohur Kosovën dhe Kryetarja Spiropali shprehu bindjen se mbështetja për Kosovën do të vazhdojë.

Kryetarja Spiropali dhe Kryetarja Mierina diskutuan edhe për intensifikimin e bashkëpunimit parlamentar, në të gjitha nivelet, në nivel Kryetarësh të Parlamenteve, Grupeve të Miqësisë, Komisioneve Parlamentare fhe deputetëve, duke përcaktuar si prioritet të këtij bashkëpunimi përshpejtimin e anëtarësimit të Shqipërisë në BE.