S’u kthye pas lejes në burg, i riu kapet pas 1 viti duke…pirë kafe

U arratis pasi theu lejen e burgut, përfundon në pranga vlonjati. Prej pothuajse një viti ishte shpallur në kërkim, pasi nuk ishte kthyer më në Burgun e Fierit ku vuante dënimin.

36- vjeçari Ervis Gjini u arrestua nga Policia e Vlorës në orët e para të ditës së martë, në lagjen “1 Maji” të Vlorës, ndërsa ishte duke konsumuar kafe në një nga lokalet e kësaj zone.

Sipas Policisë, Gjini po vuante dënimin për veprën penale të “Prodhimi dhe shitja e lëndëve narkotike” në Burgun e Fierit, por kur ka dalë me leje nuk është kthyer, duke thyer të gjitha afatet e përcaktuara.

Prej vitit të kaluar, 36-vjeçari Gjini ishte shpallur person në kërkim nga Policia, ndërsa blutë e Vlorës konfirmojnë se ky shtetas ishte në kërkim edhe për veprën penale të vjedhjes, të kryer në bashkëpunim për më shumë se një herë.

Ai ishte dënuar nga Gjykata e Vlorës me dy vjet e 6 muaj burg. Policia kishte siguruar informacione për vendndodhjen e tij, ndërsa ndërhyrja është bërë mëngjesin e të martës në një prej lokaleve të qytetit të Vlorës, në kohën kur po konsumonte një kafe. Sipas të dhënave, në momentin e arrestimit ai nuk ka tentuar të bëjë rezistencë.