“Sulltan Novruzi”, Meta: Dija, urtësia dhe drejtësia bektashiane, në shërbim të atdheut tonë të dashur

Besimtarët bektashianë kremtojnë sot Ditën e Sulltan Novruzit, ditëlindjen e Imam Aliut. Në Shqipëri Dita e Sulltan Novruzit, festa më e rëndësishme e Bektashizmit, u dekretua si festë kombëtare në vitin 1996. Kjo ditë cilësohet në mbarë botën Aleviane si dita e fisnikërisë bektashiane dhe dita e ringjalljes së madhe.

Në këtë festë të shënuar, Presidenti i Republikës Ilir Meta ishte tek Kryegjyshata Botërore Bektashiane ku uroi të gjithë besimtarët.

Meta ka përcjellë disa mesazhe gjatë fjalës së tij, duke nënvizuar vlerat e besimit bektashi. Presidenti u shpreh se kjo është një ditë për të reflektuar për vlerat e bashkëjetesës.

“Është një privilegj i veçantë që ndodhem sot këtu në kryeqendrën botërore të besimit bektashian duke ndarë mesazhet. Shembulli i Imam Aliut dhe rolet e bektashinjve shqiptarë përbëjnë garanci për të tashme dhe të ardhmen jo vetëm të këtij besimi por edhe shoqërisë. Në këtë ditë nxjerrim më shumë në dritë dhe reflektojmë vlerat e bashkëjetesës. Dija dhe urtësia janë tipare të patjetërsueshëm që kanë çuar para besimin bektashian. Ky besim dhe vlera të spikatura një shembull mbarë botëror dhe një garanci se do të trashëgohen dhe në të ardhmen në shërbim të atdheut tonë të dashur. Duke uruar nga zemra në këtë ditë hareje, shprese, gëzuar festën e Sulltan Novruzit, Paqja dhe mirësia mbretërofshin nga hera në zemrën e çdo shqiptari”, tha Meta.

Në këtë ditë çdo gjë mund të ringjallet, lind shpresa, ringjallja për gjithë njerëzimin. Ajo është një ditë e re, kur të gjithë shpresojnë për një të ardhme më të mirë.

Fjala e plotë e Presidentit Meta

“Është një privilegj i veçantë që ndodhem sot këtu, në kryeqendrën botërore të besimit bektashian për të ndarë së bashku me ju harenë dhe mesazhet optimiste të festës së shenjtë të Sulltan Novruzit.

Shembulli frymëzues i Imam Aliut, filozofia, përpjekjet dhe sakrificat e tij sublime, si dhe roli e kontributet e qenësishme të bektashinjve shqiptarë në rrjedhën e historisë, përbëjnë garanci për të tashmen dhe të ardhmen jo vetëm të këtij besimi, por edhe të gjithë shoqërisë sonë.

Kjo histori e ky shembull krijon më shumë besim dhe jep më shumë optimizëm jo vetëm për ne, por sidomos për brezat e rinj dhe të ardhmen e paqme të tyre.

Në këtë ditë pranverore, pamja madhështore që ofron ky shesh dhe kjo kryeqendër botërore me Selinë e shenjtë të Bektashizmit, e sidomos prania juaj e nderuar, nxjerrin më shumë në dritë dhe reflektojnë akoma edhe më fort vlerat e jashtëzakonshme të harmonisë e bashkëjetesës së paqtë mes besimeve fetare në Shqipëri.

Dija, urtësia dhe drejtësia janë tipare të patjetërsueshme, të cilat kanë karakterizuar dhe çuar përpara bashkësinë bektashiane ndër shekuj, të ndërthurura harmonikisht me ndjenjën e palëkundur të atdhedashurisë së pashtershme.

Pikërisht ky besim dhe këto vlera të spikatura, përcjellja e tyre brez pas brezi mbeten jo vetëm një shembull i veçantë mbarë botëror por sidomos një garanci se ato do të vazhdojnë të trashëgohen edhe në të ardhmen në shërbim të shoqërisë, vendit dhe atdheut tonë të dashur.

Këto vlera, veçanërisht sot, në këtë ditë të shenjtë të Bektashizmit, marrin një dimension shpirtëror e tokësor njëkohësisht si një busull orientuese drejt shpresës, optimizmit, paqes e harmonisë mbarë fetare, jo vetëm në Shqipëri.

Kjo ditë e bukur dhe ky manifestim i kapërcen kufijtë e kësaj kryeqendre botërore, edhe kufijtë tanë kombëtarë, duke dhuruar mesazhe të qarta mbi rëndësinë e bashkëjetesës dhe mirëkuptimit mes besimeve fetare, mes etnive, mes kombeve dhe mes vendeve, për të ndërtuar së bashku një botë të paqtë dhe për të dhuruar më shumë dashuri mes njerëzve, më shumë mirëkuptim në gjirin e familjes dhe më shumë optimizëm në zemër të shoqërive tona moderne.

Sot shpirti dhe zemrat tona mbushen me ndjenja të ripërtëritura qetësie e gëzimi për të falur dashamirësi, vëllazëri dhe bashkëpunim pa kursim, për të mirën tonë të përbashkët, për të ardhmen tonë të përbashkët dhe për të ardhmen e fëmijëve tanë.

Të nderuar të pranishëm!

Besimi i palëkundur në të plotfuqishmin Zot dhe në mësimet e shenjta, i bën mirë cilitdo.

Besimi i patundur në Atdheun tonë të përbashkët, në të ardhmen e tij të ndritur si dhe në vlerat përbashkuese kombëtare, na bën mirë të gjithëve, na bën më krenarë e më të bekuar të gjithë bashkë, si shqiptarë!

Duke uruar nga zemra në këtë ditë hareje, shprese dhe optimizmi fetar e pranveror, dëshiroj t’ua përcjell këtë urim mbarë popullit shqiptar dhe besimtarëve bektashianë kudo në botë!

Gëzuar Festën e Sulltan Novruzit! Paçi gjithmonë shëndet e mbarësi në familjet tuaja! Paqja dhe mirësia mbretërofshin ngahera në zemrat dhe shpirtrat e çdo familje shqiptare dhe të çdo shqiptari!

RITET E FESTËS
Për ndër të kësaj dite, amvisat bëjnë një laknur (byrek) të veçantë për këtë ditë, pasi në harxhë futen 12 gjethe lakrash të llojeve të ndryshme dhe një monedhë metalike. Në darkë për pjesëtarët e familjes nxirret përpara byreku, që ndahet në aq pjesë sa anëtarë janë. Zonja e shtëpisë përpara se të nisë zgjedhjen e pjesëve, lutet për fatet e pjesëtarëve të familjes dhe më pas, secili zgjedh pjesën e vet. Ai që gjen monedhën (leku), duhet patjetër që të blejë për shtëpinë një kilogram kripë, pasi parashikon një vit të mbarë. Ndërsa mbaron ky rit, familjet bektashiane në shenjë respekti e shpërndajnë një pjesë të byrekut nëpër familje kristiane.