Sulm kibernetik në Gjykatën e Hagës: Zbuluam një aktivitet të pazakontë në rrjetin tonë

Një sulm kibernetik ka prekur Gjykatën Ndërkombëtare Penale në Hagë. Një nga institucionet ndërkombëtare të profilit më të lartë në botë që trajton informacione shumë të ndjeshme rreth krimeve të luftës, ra pre e një sulmi.

ICC tha se kishte zbuluar një aktivitet të pazakontë në rrjetin e saj kompjuterik në fund të javës së kaluar, duke nxitur një përgjigje që ishte ende në vazhdim. Një zëdhënës nuk pranoi të komentojë se sa serioz ishte hakerimi, nëse është zgjidhur plotësisht ose kush mund të qëndrojë pas tij.

“U miratuan masa të menjëhershme për t’iu përgjigjur këtij incidenti të sigurisë kibernetike dhe për të zbutur ndikimin e tij”, tha ICC në një deklaratë të shkurtër.

ICC është gjykata e përhershme e krimeve të luftës në qytetin holandez të Hagës, e themeluar në vitin 2002 për të gjykuar krimet e luftës dhe krimet kundër njerëzimit. Prokurorët në gjykatë aktualisht po kryejnë 17 hetime për situata në Ukrainë, Ugandë, Venezuelë, Afganistan dhe Filipine, ndër të tjera.