Takim me strukturat e PR-së në Vlorë/Mediu: Rama mbështeti grupet kriminale dhe kanabisin

Partia Republikane ka zhvilluar një takim në Vlorë, ku është vlerësuar se kjo zonë ka mundësi pa fund por është në varfëri ekonomike dhe papunësi si pasoje e keq qeverisjes.

”Klanet kriminale të kanabisit, të mbështetur nga qeveria, të lidhura tashmë me grupet kriminale të trafikut të drogës, e kanë kthyer Vlorën në vendin e larjes së hesapeve”,-thuhet në njoftimin e PR-së.

Në fjalën e tij, kryetari i Partisë Republikane, Fatmir Mediu tha se Vlora dhe familjet e mëdha patriotike kanë bërë historinë e Shqipërisë dhe kombit.

“Shqipëria duhet të rikthehet në historinë e saj Europiane dhe Vlora duhet të rikthejë me forcë vlerat më të mira të saj, duke përbuzur regjimin e korruptuar të Ramës. Largimi masiv i të rinjve, profesionistëve nga Vlora dhe mbarë Shqipëria, po kthehet në një dramë kombëtare, duke krijuar probleme të mëdha politike, ekonomike dhe sociale. Rama nuk do të ndalet në rrugën e tij të manipulimit të zgjedhjeve, prandaj opozita pa humbur kohë duhet të bashkohet në Vlorë dhe në gjithë Shqipërinë”, vlerësoi kreu i republikanëve.