Takimi me ministrin gjerman për Europën, Basha: I kërkova të denoncojnë masakrën e 25 prillit
Ministri gjerman i Shtetit për Europën në Ministrinë e Jashtme federale, Michael Roth u prit në një takim nga kreu i PD-së Lulzim Basha. Në një prononcim për mediat nga selia blu, Basha tha se i kërkoi Roth që të denoncojnë masakrën zgjedhore të 25 prillit. Sipas Bashës, Shqipëria humbi një mundësi të artë për demokracinë, por edhe për të ecur përpara me Integrimin e vendit.
”Pata kënaqësinë të pres Michael Roth. E informova mbi masakrën zgjedhore të 25 prillit. Shqipëria humbi një mundësi të artë për demokracinë, por edhe për të ecur përpara me integrimin e vendit. Për mua, për PD, nuk ka mundësi më të mirë për të ndryshuar vendin sesa procesi Integrimit Europian. Ky është një proces i bazuar në arritje dhe merita. Për fat të keq, siç e keni parë nga rezoluta e Bundestagut, Shqipëria ka ngelur në vend numëro me kushtet e vendosura të cilat janë rënduar edhe më shumë me 25 prillin. Ne bëmë çdo gjë që kishim në dorën tonë duke nisur nga konsensusi për Reformën në Drejtësi tek Reforma Zgjedhore. I kërkova Roth që të flasin dhe të denoncojnë masakrën e 25 prillit, para se të jetë shumë vonë për demokracinë, që e njëjta situatë të mos ndodhë dhe Shqipëria të mos jetë e mbushur me kriminelë në Parlament dhe drogë”,-tha Basha.
Kurse vetë ministri gjerman për Europën, tha se rruga e Integrimit varet jo vetëm nga qeveria, por edhe nga puna mes Parlamentit dhe Opozitës. Kështu Ruth dha mesazhin që duhet bashkëpunim.
”Jam dakord me Bashën, kur thotë se e ardhmja e Shqipërisë është në BE dhe askund tjetër. Nëse kjo rrugë do të jetë e suksesshme kjo nuk varet vetëm nga qeveria, por edhe Parlamenti dhe Opozita. Shpresoj që pas debateve të gjendet një qasje me respekt mes qeverisë dhe opozitës. Komisioni Evropian ka vlerësuar në mënyrë të kujdesshme kushtet nëse janë plotësuar nga Shqipëria. Komisioni ka dalë në një përfundim pozitiv, që i është bashkuar edhe qeveria federale dhe shpresojmë që më 22 qershor, KiE të dalë në vendimin pozitiv për hapjen e negociatave”.
