Takimi me Yuri Kim, Nikolla: Kuvendi do të reflektojë një qasje të re bashkëpunimi

Kryetarja e Kuvendit, Lindita Nikolla, priti Ambasadoren e SHBA-së në Tiranë, Yuri Kim. Kim i uroi Nikollës, suksese në detyrën e lartë të Kryetares së Kuvendit të Shqipërisë. Kryetarja e Kuvendit e falenderoi ambasadoren për urimet dhe mbështetjen si dhe e siguroi për forcimin dhe zgjerimin e bashkëpunimit me Kuvendin e Shqipërisë.

“Partneriteti strategjik me SHBA është një gurë themeli i politikës së jashtme të Shqipërisë. Ne vlerësojmë shumë ndihmën e SHBA, veçanërisht për avancimin e reformës në drejtësi, të procesit të vetting-ut dhe kryerjen e reformës zgjedhore dhe të reformave të tjera në rrugën e anëtarësimit ne BE.

Ne do të rrisim përkushtimin e përgjegjësinë për të justifikuar besimin që na dhanë qytetarët në mandatin e tretë.

Unë do të kontriboj që të sjell një qasje të re në komunikim dhe veprimtarinë parlamentare, duke pasur si yll të karvanit që më udhëheq ne punën time interesat e vendit dhe jo përkatësinë time politike”, nënvizoi Kryetarja e Kuvendit, Lindita Nikolla.