Takimi për kontrollin e ar*mëve, ministri Balla: Shqipëria e vendosur në dënimin e dh*nës

Ministri i Brendshëm, Taulant Balla mori pjesë në takimin e 10-të Rajonal Koordinues, për Zbatimin e Udhërrëfyesit për Kontrollin e Armëve të Vogla dhe të Lehta në Ballkanin Perëndimor. Balla tha se Shqipëria është e vendosur në dënimin e dhunës, me krenari mbështet iniciativat e sigurisë në nivel rajonal e më gjerë.

“Këto armë, shpesh qarkullojnë ilegalisht, ato kontribuojnë në dhunë, nxisin krimin e organizuar dhe kërcënojnë sigurinë dhe zhvillimin e rajonit. Shqipëria qëndron e vendosur në dënimin e dhunës, me krenari mbështet iniciativat e sigurisë në nivel rajonal dhe më gjerë”, u shpreh Balla.

Balla vuri në dukje se një arritje e dukshme për Shqipërinë është hartimi i një Strategjie për rritjen e ndërgjegjësimit dhe komunikimit për keqpërdorimin e armëve të vogla dhe të lehta.

“Udhërrëfyesi i ardhshëm do të vendosë një theks më të madh në këto aspekte, duke njohur kërcënimet e shkaktuara nga përdorimi i paligjshëm dhe kriminal i eksplozivëve dhe pararendësve të tyre për qëllime terroriste. Ndërsa kalojmë nëpër këtë sezon të Vitit të Ri, është bërë një angazhim personal për të reduktuar abuzimin me piroteknikë dhe eksplozivë, veçanërisht gjatë kësaj periudhe. Bashkëpunimi midis autoriteteve relevante është forcuar për të siguruar kontrollin mbi përdoruesit e paligjshëm dhe për të parandaluar çdo ngjarje ose prishjen e qetësisë publike”, tha Balla.