Të moshuarit pushime në Palasë, Manastriliu: Çelet qendra e re verore

Në kuadër të sezonit veror, në fshatin turistik të Palasës është çelur qendra më e re komunitare për moshën e tretë. Ministrja e Shëndetësisë dhe Mbrojtjes Sociale, Ogerta Manastirliu e shoqëruar nga kryetari i bashkisë së Himarës, Jordo Goro vizituan sot ambientet e qendrës së re komunitare për moshën e tretë në Palasë.

Gjyshet dhe gjyshërit e Shtëpisë së të Moshuarve Tiranë, kanë vizituar ambientet e qendrës ku edhe do të kalojnë ditët e nxehta të verës. ”Bashkë me kryetarin e bashkisë së Himarës Jorgo Goro, hapëm qendrën e re komunitare për moshën e tretë në Palasë. E gëzuan të parët gjyshet dhe gjyshërit e Shtëpisë së të Moshuarve Tiranë, që po kalojnë ditët e nxehta të verës në këtë qendër model, një investim i qeverisë shqiptare që tregon vëmendjen për të moshuarit e vetmuar, për ata që kanë më shumë nevojë për kujdes dhe dashuri”,-thotë ministrja e Shëndetësisë.

Nga ana e tyre, të moshuarit shprehen se kushtet në qendër janë shumë të mira. “Kushtet janë të shkëlqyera, dhomat janë të mëdha janë të mira, pastërtia është shembullore”,-thotë një nga gjyshërit. “Këtu duket gjë e mirë”,-thotë një tjetër i moshuar. ”Kemi ardhur për herë të parë në fakt, shumë mirë. Është e përsosur, nuk kam parë kështu, shumë të kënaqur jemi”,-përfundon një tjetër i moshuar. Palasë është fshati i parë i krahinës së Himarës, pasi kalon qafën e Llogarasë dhe zbret 5 kthesat në shpat të malit. Fshati Palasë ndodhet 50 km në Jug të Vlores, 74 km në veri të Sarandës dhe rreth 210 km nga kryeqyteti Tiranë. Palasa është e përfshirë në bashkinë e Himarës, pjesë e Qarkut Vlorë.

Qendra e re ka kapacitet 37 shtretër, me 13 dhoma, me pajisje moderne, e ndërtuar me infrastrukturë bashkëkohore, bazuar në standardet e përkujdesit shoqëror për të moshuarit në institucionet publike dhe jopublike, ku i është dhënë rëndësi jo vetem ofrimit të shërbimeve bazë por edhe krijimit të mundësive për aktivitete rekreative. Qendra ka bibliotekën, sallën e kinemasë, sallën e aktiviteteve, dhe disa ambinte të tjera të përbashkëta për të kaluar kohën e lirë të moshuarit që janë në qendrat rezidenciale publike. Investimi i bërë nga Ministria e Shëndetësisë dhe Mbrojtjes Sociale nuk ka synuar vetëm përshtatjen e infrastrukturës, por dhe personelin e kualifikuar që i shoqëron të moshuarit, që është ai i qendrës ku ata janë rezidentë. Shërbimet që ju ofrohen janë konform standardeve dhe të personalizuara për individë me nevoja të veçanta.