Tërhiqet Ferdinand Xhaferaj, jo kandidat për Kryesinë e PD-së

Kreu i degës së Partisë Demokratike në Durrës, Ferdinand Xhaferaj nuk do të jetë kandidat për Kryesinë e Partisë Demokratike, duke u tërhequr vetëm pak orë para votimit.

Xhaferaj ka njoftuar strukturat e PD-së që një natë më parë se nuk do të marrë pjesë në garë duke kërkuar që të hiqej emri i tij. Emri i tij ishte mes 45 demokratëve që do të kandidonin për kryesinë, por tashmë është tërhequr.

Sot do të mblidhet Këshilli Kombëtar i Partisë Demokratike. Nga lista me nënkryetarët, sekretarët dhe kandidatët e kryesisë, emri i Bujar Nishanit nuk figuron në asnjë prej listave.

Edmond Spaho i cili është larguar si nënkryetar i PD-së, nuk rezulton as në mesin e kandidatëve për në Kryesi. Sahit Dollapi, i cili u largua nga Sekretariati Organizativ është automatikisht jashtë. Florion Mima i cili merrej me çështjet ekonomike të partisë, po ashtu nuk figuron në asnjë listë.