Tërmetet në Vlorë, shtabi i emergjencave: Çadra për banorët

Prefektura e Vlorës, ka mbledhur sot Shtabin e Emergjencave për të diskutuar për situatën e tërmeteve të rëna ditët e fundit në këtë zonë. Sipas Shtabit të Emergjencave 9 shtëpi janë të pabanuara për shkak të dëmtimeve që kanë marrë nga lëkundjet e tërmetit. Po ashtu është kërkuar që të ngrihen çadra për strehimin e banorëve.

Tërmetet kanë filluar prej mbrëmjes së 19 majit, ku deri në orët e para të mëngjesit të djeshëm u regjistruar 14 lëkundje, ndërsa gjatë natës së kaluar janë shënuar 3 lëkundje. Tërmetet kanë krijuar panik te shumë banorë, të cilët kanë kaluar në qiell të hapur dy netët e fundit, por kanë sjellë dhe dëmtime të shumta, duke shkatërruar banesat.

Problemet më të mëdha janë shënuar në fshatrat Bashaj, Matogji dhe Vërmik, ku disa banesa janë të pabanueshme. Prefekti i Vlorës, Flamur Mamaj, ka deklaruar se do të largohen nga banesat familjet që rrezikojnë.