Tetë vite burg zviceranes, mashtroi agjentë të SHISH dhe disa biznesmenë

Dënohet me 8 vite burg Agnese Foure Maria Somma, që njihet si e dashura e ish-efektivit të Shërbimit Informativ, Genti Roshi dhe administratoria e dy kompanive “IXY Prelude Evolution” dhe “Crofin Swiss Management”.

 Zviceranja rezulton të ketë mashtruar dhe ish-drejtorin e SHISH në degën e Durrësit, Eduart Dake si dhe disa biznesmenë të tjerë.

Në Shqipëri ajo njihet me emrin Anjeze Fure. Pasi u ka marrë një pjesë të konsiderueshme të parave të dhëna nga persona të ndryshëm është larguar nga Shqipëria, ndërkohë procesi penal kundër saj, ka vijuar në mungesë.

Në Gjykatën e Tiranës, janë zhvilluar 12 seanca gjyqësore, ku në fund prokurori i dosjes Etion Kapo, kërkoi dënimin e shtetases zvicerane me 12 vite burg. Edhe gjykata vendosi ta dënojë atë me 12 vjet për akuzën e “Mashtrimit me shuma të mëdha financiare”, por për shkak të gjykimit të shkurtuar zvicerania u dënua përfundimisht me 8 vjet burg.

Anjeze Fure është shpallur fajtore për rreth katër raste ku mësohet se ka mashtruar ish-drejtorin e SHISH-it, Eduard Dake, të cilit i ka marrë edhe 30 milion lekë dhe 6 milionë lekë të tjera i kishte marrë i dashuri i saj Genti Roshi, ky i fundit i përfshirë në plagosjen e Eduart Dakes.

Personat e tjerë të mashtruar janë Kastriot Zaka, Aleksandër Jorgoni, Enkeleda Jorgoni dhe Mikaelo Terpo. Disa prej personave të mashtruar nga ana e zviceranes nuk janë paraqitur në gjykatë për të dëshmuar. Vendimi i dënimit të saj është dhënë nga Gjykata e Tiranës, pas kthimit të çështjes nga gjykata e Apelit Tiranë. Më parë kjo shtetase ishte dënuar me 11 vite burg për të njëjtën akuzë.