Tha se po plotëson kërkesat, studentët i përgjigjen Ramës: Shumë pak, shumë vonë dhe me hile

Ditën e sotme kryeministri Edi Rama doli para mediave, ku dha detaje rreth vendimeve që do të ndërmerren nga qeveria për 8 kërkesat e studentëve.

Rama i mori pikat një nga një, por në fakt janë miratuar vetëm katër vendime që prekin disa nga kërkesat e studentëve.

Në fillim të fjalës së tij, Rama tha:

Arsyeja e kësaj Konference është mbledhja e sapo përfunduar e qeverisë ku në fokus kanë qenë studentët, jo vetëm kërkesat e tyre por edhe aspekte të tjera që janë vendosur në vëmendjen tonë si element thelbësorë të dokumentit për paktin me universitetin që do e bëjmë publik në mesin e muajit të ardhshëm. Sidoqoftë në mbledhje jo vetëm kemi diskutuar por edhe marrë disa vendime të rëndësishme që adresojnë kërkesat e studenteve dhe shkojnë përtej tyre ashtu sikurse kemi thënë dhe si besojmë se është e domosdoshme për ta future universitetin në një fazë të dytë drejt një reforme transformuese që jo vetëm nuk duhet të zmbrapset por të thellohet.”
Mirëpo, pavarësisht gjuhës së përdorur nga Rama dhe propagandës disaditore të qeverisë se “studentët i kanë dhënë një shuplakë”, me sa duket e vërteta qëndron ndryshe.

Në një deklaratë të publikuar nga lëvizja “Për Universitetin”, studentët shprehen se Rama ka bërë shumë pak, shumë vonë dhe me hile.

Deklarata e plotë:

SHUMË PAK, SHUMË VONË, ME HILE

Gjatë daljes së sotme publike, kryeministri Rama nuk habiti askënd me refuzimin e tij për t’u dhënë zgjidhje substanciale kërkesave të studentëve:

1. Shumica dërrmuese e studentëve të masterit do të vazhdojë të paguajë tarifa vjetore nga 60,000 deri në 115,000 lekë (të reja) në vit.

2. Pesha e fuqisë studentore në zgjedhjen e autoriteteve drejtuese të universitetit do të mbetet në 10% mjeran. Vota e një pedagogu do të vijojë të vlejë rreth 300 herë më shumë se ajo e një studenti. As Rama e askush tjetër nuk ka mundësi të marrë në shqyrtim mbi 20’000 universitetet e kësaj bote. Mirëpo ka plot raste ku pesha e votës studentore është më e lartë se 10%. Një shembull mund të ishte Universiteti Autonom i Barcelonës.

3. Bordet e Administrimit të universiteteve do të vazhdojnë të kontrollohen nga qeveria. Premtimi se një prej përfaqësuesve të qeverisë do të zgjidhet prej 3 propozimeve që vijnë nga strukturat përfaqësuese të studentëve është hileqar. Çdo qeveri i ka aq në dorë strukturat burokratike studentore (këshillat studentorë) sa për të futur një vegël të saj në listën 3-emërore.

4. Qeveria nuk ka treguar se sa do të rritet buxheti i shtetit për arsimin e lartë. Rama tha se në vitet në vijim do të ketë ulje të ndjeshme të kuotave për studimet bachelor në universitetet publike. Çdo ulje tarifash bachelor-i do të shoqërohet me ulje të numrit të studentëve, çka nënkupton se financimi shtetëror për universitetet publike nuk do të ndryshojë ndjeshëm.

5. Në kushtet ku diplomoret private lulëzojnë, çdo ulje kuotash në universitetet publike nuk do të zgjidhë “mbiprodhimin” e gazetarëve apo juristëve, por thjesht do t’i shtyjë kandidatët për gazetarë dhe juristë drejt diplomoreve private, duke sjellë miliona euro shtesë për pronarët e tyre.

6. Mbi të gjitha, qeveria konsideron të panegociueshëm jo vetëm rrëzimin e ligjit të arsimit të lartë, por edhe ndryshimin e pjesshëm të tij:
a. Universitetet publike do të vazhdojnë të vuajnë nga pasiguria financiare, e cila sjell me vete rritjen abuzive të kuotave të studimeve master, lëshimin e notës dhe komercializimin e jetës universitare.
b. Diplomoret private do të kenë sërish mundësi të fusin duart në buxhetin e shtetit.
c. Tarifat e studimeve mund të rriten që vitin e ardhshëm si rezultat i pakësimit të buxhetit për universitetet publike.
d. Universitetet do të vazhdojnë të jenë të varura nga qeveria dhe të pavarura nga studentët.
Për të gjitha këto arsye, protestat duhet të vazhdojnë dhe të bëhen më masive deri në PLOTËSIMIN E TË GJITHA KËRKESAVE STUDENTORE DHE RRËZIMIN E LIGJIT TË ARSIMIT TË LARTË.
STUDENTËT E BASHKUAR KANË PËR TË FITUAR!