Tirana në ”kafaz”

Si fundjavën e kaluar, edhe këtë herë Shqipëria u izolua për 40 orë. Dyert e shtëpive në Tiranë u mbyllën në orën 13:00 të së shtunës dhe mund të rihapen në 05:00 të së hënës. Rol në skenën boshe të kryeqytetit kishin edhe punonjësit e pastrimit, kategori e përjashtuar nga izolimi. Ata vijuan detyrën në qytetin që nuk ndotet më si më parë. Heshtja nuk i përkiste vetëm rrugëve kryesore, por edhe rrugicave në komplekset e banimit. Përgjigjen nëse kjo vjen për shkak të frikës nga gjobat, apo ndërgjegjësimit, mund ta japin vetëm qytetarët. Fakt është se, Tirana, këtë të diel, është më bosh se asnjëherë tjetër.